السَّلاَمُ عَلَيْكُمْ وَرَحْمَةُ اللهِ وَبَرَاكَاتُهُ
الحَمْدُ لله الحَمْدُ لله الَذِى أَمَرَناَ أَنْ لاَ نَعْبُدَ إِلاَّ إِياَّهُ. وَأَمَرَناَ كُلاًّ مِناَّ بِإِحْسَانِ وَالِدَيْهِ. أَشْهَدُ أَنْ لاَ اِله إِلاَّ الله وَحْدَه لاَ شَرِيْكَ لَه رَحِيْمٌ لِّلْمُؤْمِنِيْنَ وَلِلْخَائِفِيْن اَمَاناً. وَأَشْهَدُ أَنَّ سَيِّدَنَا مُحَمَّدً عَبْدُهُ وَرَسُوْلُه .قَالَ القَائِلُ لاَ يَجْزِى وَلَدٌ وَالِدَهُ إِلاَّ يَجِدَهُ مَمْلُوْكاً فَيَشْتَرِيَهُ لِيُعْتِقَهُ. اللَّهُمَّ صَلِّ وَ سَلِّمْ عَلَى سَيِّدِناَ مُحَمَّد وَعلَى آلِه وَأَصْحَابِه حَمْلَةُ الهُدَى وَاْلبَيَان
أَمَّا بَعْدُ – فَيَا عِبَادَ اللهِ ! إِتَّقُوْا اللهَ حَقَّ تُقَاتِه وَلاَ تَمُوْتُنَّ إِلاَّ وَأَنْتُمْ مُسْلِمُوْنَ فَقَدْ فَازَ اْلمُتَّقُوْن وَأَطِيْعُوْا اللهَ لَعَلَّكُمْ تُفْلِحُوْنَ
Hadirin sidang Jum’at ingkang minulyo
Langkung rumiyin, monggo kita sareng-sareng muji syukur dhumateng Allah SWT, ingkang sampun paring pinten-pinten rahmat lan kanikmatan sehingga kita saged angrawuhi ibadah Shalat Jumat, wonten Masjid ingkang mubarakah.
Shalawat saha salam mugi tansah katuraken dhumateng junjungan kita, Nabi Muhammad SAW, ingkang sampun paring piwulang dhateng kula lan panjenengan sedaya, sehingga kita saged dados tiyang ingkang mukmin. Mugi-mugi benjang dinten kiyamat, kita sedaya saged pikantuk syafa’at saking Rasulillah SAW. Amien yra.
Sak lajengipun, kawula ngajak dhumateng awak kula piyambak, ugi dhumateng panjenengan sedaya. Mangga kita sami ningkataken taqwa lan ajrih dhateng Allah SWT. Inggih menika, kanti ngestokaken sedaya dawuh-dawuhi pun, lan nebihi sedaya awisan-awisani pun. Amargi kanti taqwa menika, kita saged kaparingan pitedah. Saged mbentenaken perkawis ingkang sae lan awon, hak lan batil, ugi halal lan haram. Mekaten ugi kita saged pikantuk pangapunten utawi maghfirah saking Allah SWT.
Hadirin Jamaah Jumat Rahimakumullah
Kita kedah mangertos bilih, wonten ing alam dunyo puniko, kita dipun ciptaaken dening Allah, mboten sanes inggih namung kangge ngibadah lan ngabekti dumateng Allah SWT. Artasipun, sedaya gerak lampah, tumindak, lan pangendikan kita, kedah dipun landasi niat ngibadah, ngawula dhumateng Allah SWT. Wonten Al-Quran, Allah SWT sampun dhawuh:
وَماَ خَلَقْتُ الْجِنَّ وَ اْلإِنْسَ إِلاَّ لِيَعْبُدُوْنِ
Ingkang artasipun: “Aku ora nyipta’ake bangsa jin lan manungso kejaba supaya ngawula/ngibadah maring Ingsun (Allah SWT)”.
Allah ugi dhawuh wonten ing Surat An-Nisa’ 36:
وَاعْبُدُوا اللَّهَ وَلَا تُشْرِكُوا بِهِ شَيْئًا ۖ وَبِالْوَالِدَيْنِ إِحْسَانًا وَبِذِي الْقُرْبَىٰ وَالْيَتَامَىٰ وَالْمَسَاكِينِ وَالْجَارِ ذِي الْقُرْبَىٰ وَالْجَارِ الْجُنُبِ وَالصَّاحِبِ بِالْجَنْبِ وَابْنِ السَّبِيلِ وَمَا مَلَكَتْ أَيْمَانُكُمْ ۗ إِنَّ اللَّهَ لَا يُحِبُّ مَنْ كَانَ مُخْتَالًا فَخُورًا
Ingkang Artasipun: “Lan ngabektiyo siro kabeh marang Allah SWT. Lan ojo siro kabeh pisan-pisan nyekutoake Allah. Lan gaweo kabecikan marang wong tuwo loro, sanak kerabat, bocah-bocah yatim, wong-wong fekir, tonggo kang cedak lan tonggo kang adoh, konco akrab, ibnu sabil lan hamba sahayamu. Sak temene Allah iku ora seneng tumrap wong kang sombong lan bangga’ake awak dewe”. (QS. an-Nisa : 36).
Ayat menika paring pitedah, bilih sak sampunipun perintah ngabekti dumateng Allah, tiyang Islam ugi dipun perintah ngabekti dumateng tiyang sepah kekalih. Meniko wajib kito lampahi kanti ikhlas.
Menawi kito penggalih, kita raosaken. Raos welas asih ingkang ageng, sak sampunipun welasipun Allah, meniko raos welas asih saking tiyang sepah marang putranipun. Pramilo, perintah bektos dumateng tiyang sepah kekalih, ing ndalem ayat menika, dhumawah persis sak sampunipun bekti dhumateng Allah SWT.
Kito saged mangertosi rekasanipun ibu naliko ngandhut putranipun. Lajeng sak sampunipun putra lahir, Ibu ugi ikhlas dahar ingkang anyep-anyep, saha ingkang sarwo pahit, kados jamu-jamuan, supados putranipun tetap sehat wal afiyat. Sarenipun ugi mboten saged jenak, wungu sebab tangisipun ingkang putra. Semanten ugi Bapak, perjuangan lan pengorbananipun kangge keluarga ageng sanget. Sampun sak mestinipun kita sedaya ngabekti dumateng tiyang sepah kekalih, lan jagi hak-hakipun.
Allah sampun dawuh wonten ing surat Luqman ayat 14:
وَوَصَّيْنَا ٱلْإِنسَٰنَ بِوَٰلِدَيْهِ حَمَلَتْهُ أُمُّهُۥ وَهْنًا عَلَىٰ وَهْنٍ وَفِصَٰلُهُۥ فِى عَامَيْنِ أَنِ ٱشْكُرْ لِى وَلِوَٰلِدَيْكَ إِلَىَّ ٱلْمَصِيرُ
Ingkang artasipun: “Lan tak perintahake marang menungsa, supaya ngabekti marang wong tuwane loro. Ibune wis ngandhut kanthi lemes lan tambah-tambah sayah, lan Ibune nyapih sak wuse 2 tahun. Mangka syukuro marang Aku (Allah), lan marang wong tuwamu. Lan namung marang Aku ( Allah) siro kabeh bakal bali”. (QS. Lukman: 14).
Ayat Al-Quran kala wau ngimutaken, bilih menawi tiyang sepah kita taksih sugeng, mangga kita sami mulya’aken. Kita hormati, kita taati. Kita gugu dhawuh-dhawuhipun lan perintah-perintahipun ingkang boten nyimpang saking syari’at Islam. Kita nebihi napa ingkang dadosaken kuciwo manahipun tiyang sepah kekalih. Sebab, saged kita tingali ing zaman akhir menika, kathah sanget putra ingkang kumowantun dumateng tiyang sepahipun. Jangkar, kirang tatakrama. Kadang malah kebablasen, ngantos niya’-niyaaken ibu bapakipun. Sejatosipun, tiyang kalawau sampun nglampahi dosa ageng. Namung piyambakipun mboten kraos. Na’udzubillahi min dzalik. Rasulullah SAW sampun paring dawuh:
أَكْبَر الْكَبَائر الشِّرْكُ بالله وقَتْلُ النَّفْسِ وَعُقُوْقُ الوَلدَيْن وَقَوْلُ الزُوْر (رواه البخاري)
Ingkang artasipun: “Dosa-dosa ingkang ageng inggih puniko: syirik dateng Alloh SWT, mateni dateng awak-awakan, duroko dateng tiyang sepah kekalih, lan guneman awon (Hadits Riwayat Imam Bukhari).
Hadirin Jamaah Jumat Rahimakumullah
Menawi nderek pengendikane Rasulullah SAW, bilih birrul walidain, utawi bekti dhumateng tiyang sepah kalih, meniko anggadahi hikmah ingkang ageng sanget. Saged ndatengaken kabegjan, nggampangaken rizki, lan manjangaken umur. Kados dhawuhipun Kanjeng Rasul.
مَنْ بَرَّ وَالِدَهُ طُوبَي لَهُ وَزَادَ اللهُ في عُمُرِهِ (رواه البخاري)
Artasipun: “Sopo wong kang bekti marang wong tuwo lorone, mangka bakal beja uripe lan Alloh bakal ndawa’ake umure”
Kosok wangsulipun, tiyang ingkang duroko lan kumowantun dateng tiyang sepah, mboten purun bekti dateng tiyang sepah, menika termasuk tiyang ingkang rugi, mboten saged mlebet lan ngraosaken suwarganipun Gusti Allah SWT. Kanjeng Nabi Muhammad SAW sampun dhawuh:
أرْبَعُ حَقٍّ عَليَ اللهِ أَنْ لآ يُدْخِلَهُمْ الجَنَةَ وَلآيُديقَهُمْ نَعِيْمَهَا : مُدْمِنُ خَمْرٍ، وأ كيلُ الرِّبَا، وَأ كْلُ مَالِ اليَتيْمِ بِغَيْرِ حَقٍّ، والعَاقُ لِوَالدَيْهِ (رواه الحاكم)
Artosipun: “Wonten sekawan jenis tiyang, ingkang haq Alloh mboten bade nglebetaken suwarga, lan mboten bade ngraosaken nikmatipun suwargonipun Allah: 1) Tiyang ingkang minum khomer utawi pemabuk; 2) Tiyang ingkang mundut harta riba termasuk rentenir; 3) Tiyang ingkang mangan bandanipun lare yatim; lan 4) Tiyang ingkang kumowantun nyakiti dateng tiyang sepah kekalih”.
Pramila, mangga para hadirin, minangka akhir saking khutbah Jumat menika, mangga kita tansah ngimut-ngiut, bilih ridanipun Allah SWT menika gumantung wonten ing ridanipun tiyang sepah kekalih. Semanten ugi bendunipun Allah, menika gumantung wonten ing bendunipun tiyang sepah kekalih. Kados sampun didhawuhaken Rasulullah SAW:
رِضَي اللهِ فِي رِضَي الوَلِدَيْنِ وَسُخْطُ اللهِ فِي سُخْطِ الوَالِدَيْنِ
Menawi tiyang sepah kita taksih sami sugeng, mangga kita tansah mulyaaken. Tansah paring bebungah dateng tiyang sepah. Sampun ngantos dadosaken kuciwa manahipun. Menawi pyambakipun sampun sumare wonten alam kubur, kita ugi tansah dungaaken, minangka tanda bekti putra dhateng tiyang sepah kekalih. Mugi-mugi kita kagolong tiyang ingkang taat dumateng Allah, taat dumateng rasul, lan bekti dumateng tiyang sepah kekalih. Amin yra.
اَعُوْذُ باِلله مِنَ الشَّيْطاَنِ الرَّجِيْمِ بِسْمِ الله الرَّحْمنِ الرَّحِيْمِ. وَقَضَى رَبُّكَ أَنْ لاَ تَعْبُدُوْا إِلاَّ إِياَّهُ وَباِلْوَالِدَيْنِ إِحْساَناً إِماَّ يَبْلُغَنَّ عِنْدَكَ اْلكِبَرَ أَحَدَهُمَا أَوْ كِلاَهُمَا فَلاَ تَقُل لَهُمَا أُفٍّ وَلاَ تَنْهَرْهُماَ وَقُلْ لهَمُاَ قَوْلاً كَرِيْماً
باَرَكَ اللهُ ليِ وَلَكُمْ فيِ ْالقُرْآنِ اْلعَظِيْمِ – وَنَفَعَنيِ وَإِياَّكُمْ بِمَا فِيْهِ مِنَ اْلآياَتِ وَالذِّكْرِ اْلحَكِيْمِ – وَتَقَبَّلَ مِنيِّ وَمِنْكُمْ تِلاَوَتَهُ إِنَّهُ هُوَ السَّمِيْعُ اْلعَلِيْم – أَقُوْلُ قَوْليِ هَذَا وَاسْتَغْفُرُ اللهَ اْلعَظِيْم ليِ وَلَكُمْ وَلِسَائِرِ اْلمُسْلِمِيْنَ وَاْلمُسْلِمَات وَاْلمُؤْمِنِيْنَ وَاْلمُؤْمِنَات فَاسْتَغْفِرُوْهُ إِنَّهُ هُوَ اْلغَفُوْرُ الرَّحِيْمِ.
